پرویز خٹک کیسے سبقت لے جا سکتے ہیں

تحریک انصاف کے لیئے اس کی پہلی حکومت کڑا امتحان ہے۔ اس کے سربراہ، وزیر اعلی، پرویز خٹک، کی کامیابی پر ان کی جماعت کے مستقبل کا انحصار ہوگا۔ اگر وہ اپنے ایجنڈہ میں درج ذیل نکات بھی شامل کر لیں تو ان کے لیئے دوسروں پر سبقت لے جانا آسان ہو جائے گا۔

الف) شکایات کی شنوائی نہائت آسان کر دیں۔ ہر محکمہ کے سکرٹری، ہر ادارہ کے سربراہ، صوبائی پولیس افسر (آئی۔ جی۔) اور ہر ضلع انتظامیہ کے سربراہ کو ہدائت کریں کہ اپنے اپنے دفتر میں سیل بنائیں، جو ای میل اور ویب سائیٹ سے عوام کی شکایات وصول کرے اور اسی دن متعلقہ افسر سے ای میل سے جواب طلب کرے۔ چند دن میں تسلی بخش جواب لے کر شکائت کنندہ کو بھیجا جائے۔ براہ راست سربراہ کو جواب دینے میں نچلے عملہ میں ٹال مٹول اور کاہلی نہیں ہوگی۔ ای میل اب خاصی عام ہے۔ اس کے استعمال سے کاغذ پر لکھی شکائت پر کاروائی میں تاخیریا اس کے گم ہو جانے کا امکان نہ رہے گا۔

ب) مقامی حکومتوں کا 2001 کا قانون اصل حالت میں نافذ کریں۔ بعد میں کی جانے والی ترامیم نظر انداز کر دیں کیوںکہ وہ سیاست کاروں نے اپنے فائدہ کی خآطر اور نظام کمزور کرنے کے لیئے کی تھیں۔ جب تین چار دفعہ الیکشن ہو جائیں تو پھر ظاہر ہونے والی خامیوں کو دور کرنے کے لیئے ضروری ترامیم کی جا سکتی ہیں۔

پ) مقامی حکومتوں کے قانون کے تحت ہر ضلع میں ضلع محتسب کا تقرر کریں، جو مقامی انتظامیہ کی خلاف قانون کاروائی منسوخ کر سکے۔ یوں عوام کو فوری انصاف ملے گا اور بیشتر معاملات میں عدالت سے رجوع کی ضرورت نہیں رہے گی۔

ت) نچلی سطح پر ججوں کی تعداد کئی گنا بڑھا دیں۔ سول جج و جوڈیشل مجسٹریٹ اتنے زیادہ کر دیں کہ مقدمہ کی کاروائی دنوں میں پوری ہو جایا کرے۔ جلد فیصلوں سے انصاف ملے ہوگا، جو تحریک انصاف کا بڑا مقصد ہے۔ جب تک عمارتیں نہ بنیں، خیموں میں عدالتیں لگائیں۔

ٹ) یکساں نصاب جلد از جلد نافذ کریں۔ اگر ایک سال میں ایک جماعت میں نصاب تبدیل کریں گے تو وہی غلطی ہوگی، جو صدر ضیاء الحق کے دور میں کی گئی۔ اس وقت فیصلہ ہوا کہ ذریعہ تعلیم اردو کر دیا جائے۔ ایک سال میں ایک جماعت میں تبدیلی لائی گئی۔ جب آخر تک پہنچے تو محمد خاں جونیجو وزیر اعظم بن چکے تھے۔ انھوں نے سائنس مضامین انگریزی میں پڑھانے کی اجازت دے دی۔ نجی سکولوں نے، جو انگریزی میڈیم ہی کی بدولت کمائی کرتے تھے، پیر پھیلا لیئے اور وہیں پہنچ گئے جہاں سے چلے تھے۔

یکساں نصاب کے لیئے اگلے مارچ تک تیاری کریں۔ تمام استادوں کو نئے نصاب کی کتابیں ابھی سے دے دیں۔ جہان تک ہو سکے تحصیل اور ضلع صدرمقاموں پر ان کی تربیت کا انتظام کریں۔ اگلے تعلیمی سال سے پہلی سے آٹھویں جماعت سارا نصاب بدل دیں۔ ایک سال تھوڑی سی مشکل ہوگی۔ اس کے  بعد روانی آ جائے گی۔ اس کے بعد نویں جماعت سے نصاب بدلیں اور ایک ایک سال میں 12ویں تک تبدیلی لے آئیں۔

ث) یکساں نصاب کے ساتھ ذریعہ تعلیم بھی سب کے لیئے اردو کریں ورنہ طبقاتی تقسیم برقرار رہے گی۔ نجی سکول بدستور انگریزی میں سب کچھ پڑھا کر بچوں میں احساس برتری پیدا کرتے رہیں گے۔ اس طرح طبقاتی تقسیم جاری رہے گی۔

ج) مقامی حکومتوں کے انتخابات ہوتے ہی ضلع حکومتوں سے کہیں کہ اپنی تعلیمی ضرورتیں پوری کرنے کے منصوبے بنائیں۔ جہاں ضرورت ہو نئے سکول بنائیں۔ موجودہ سکولوں میں مزید کمرے، چاردیواری، پانی، بجلی، ٹائلٹ، وغیرہ کے لیئے تخمینے تیار کریں۔ پھر صوبائی حکومت ہر ضلع کو صوبائی مالیاتی کمشن کے ذریعہ زیادہ سے زیادہ رقوم دے۔ پہلے سال ہی میں تعلیم میں انقلاب نظر آ جائے گا۔

چ) صحت کا نظام درست کریں۔ ایلوپیتھ ڈاکٹر کبھی بھی مطلوبہ تعداد میں دیہات کے شفاخانوں میں کام نہیں کریں گے۔ صوبائی حکومت ان کے نخرے اٹھانے کی بجائے اپنے ہومیوپیتھ اور طبیہ کالج کھولے۔ دیہی طلبہ کو داخلہ میں ترجیح دی جائے، اعلا معیار کی تعلیم دی جائے اور ریسرچ میں دلچسپی پیدا کی جائے۔ یہاں سے سند لے کر نکلنے والے دیہات میں کام کرنے کو تیار ہوں گے۔ دوائوں کی منظوری کے لیئے تجربہ گاہیں بنائی جائیں۔ مقصد مریضوں کا علاج ہونا چاہیئے، کسی بھی طریقہ سے ہو۔

ح) پن بجلی کے منصوبوں کے لیئے نجی سرمایہ کاری کرائیں۔ صوبہ میں 40، 50 ہزار میگاواٹ پن بجلی پیدا کی جا سکتی ہے۔ مرکزی حکومت سے پالیسی منظور کرائیں۔ اس کے بعد ملکی و غیرملکی سرمایہ کاروں کو دعوت دیں کہ وہ جہاں چاہیں چھوٹے بڑے ڈیم بنائیں اور بجلی بنا کر مقررہ ریٹ پر نیشنل گرڈ میں داخل کریں۔ شمس الملک صاحب کو اس کام کا نگران بنائیں۔ پیداوار میں اضافہ کے ساتھ ساتھ مہنگی بجلی سسٹم میں سے نکلتی جائے گی اور ملک بھر میں بجلی سستی ہوتی جائے گی۔

خ) کالاباغ ڈیم تعمیر کرائیں۔ کالاباغ سندھ دریا پر واحد جگہ ہے، جہاں پانی کی سطح زمین سے اونچی ہے۔ چنانچہ صرف یہیں سے نہریں نکال کر صوبہ میں اراضی سیراب کی جا سکتی ہے۔ پچھلی حکومتوں نے اپنے پائوں پر خود کلہاڑی مارتے ہوئے اپنے صوبہ کو پانی کا جائز حصہ بھی نہ لینے دیا، صرف اس لیئے کہ پنجاب کو بجلی کی رائلٹی نہ ملے۔

د) صوبہ کا نام تبدیل کرائیں۔ عوامی نیشنل پارٹی کو 2003 میں جوش آیا کہ صوبہ کا نام "پختون خوا" رکھا جائے۔ وہ بھی اس لیئے کہ امریکیوں کا منصوبہ تھا کہ اس نام سے ہمارے اور افغانستان کے پٹھان علاقوں پر مشتمل ایک نیا ملک بنایا جائے۔

تحصیل، ضلع اور ڈویژن کا نام اس کے صدر مقام کے نام پر ہوتا ہے۔ صوبہ بھی انھی کی طرح انتظآمی یونٹ ہے۔ ہمارے کسی صوبے کے نام کی بنیاد لسانی یا نسلی نہیں۔ سندھ کا صوبہ بمبئی کو اور شمال مغربی سرحدی صوبہ پنجاب کو تقسیم کر کے بنایا گیا۔ پنجاب کا نام جغرافیائی ہے۔ بلوچستان تو 1970 تک صوبہ ہی نہ تھا۔ پھر بلوچوں کی آبادی آْدھے سے بھی کم ہے۔

ویسے بھی "خیبر پختون خوا" ابھی تک زبانوں پر نہیں چڑھ سکا۔ بہت سے لوگ صحیح طرح نہ تلفظ ادا کرتے ہیں اور نہ لکھتے ہیں۔ پھر جس طرح دو لفظوں والے ناموں میں سے پہلا ہی زیادہ بولا جاتا ہے (جیسے ٹیلی ویژن کے "ریموٹ کنٹرول" کی بجائے صرف "ریموٹ")، آخرکار نام "خیبر" رہ جائے گا۔ شمال مغربی سرحدی صوبہ بھی آخر کار صرف "سرحد"رہ گیا۔

صوبائی اسمبلی سے قرارداد منظور کرا کے مرکزی حکومت سے کہیں کہ آئین میں ترمیم کرے اور صوبہ کا نام وہی رکھا جائے، جو اس کا صدر مقام ہے۔ اس طرح تحریک انصاف صوبائِیت، لسانیت اور نسل پرستی سے بالاتر ہو کر دوسرے صوبوں کے لیئے مثال قائم کرے گی کہ وہ بھی اپنے اپنے صدر مقام کے مطابق نام رکھیں۔ صوبہ کا نام "پشاور" رکھںے سے ہزارہ صوبہ کی مانگ بھی ختم ہو جائے گی کیونکہ انھیں نئے نام والے صوبہ میں رہنے پر کوئی اعتراض نہ ہوگا۔

اگر پرویز خٹک پہلے 100 دنوں میں دھاک بٹھانا چاہتے ہیں تو انھیں ہر روز کئی کئی بڑے قدم اٹھانے ہوں گے۔ اسی طرح وہ لوگوں کو قائل کر سکیں گے کہ تبدیلی آ رہی ہے اور اسی طرح وہ دوسروں پر سبقت لے جا سکتے ہیں۔

11 جون 2013